By Sappan K.C.
२५सेप्टेम्बर२००६(एजेन्सीहरु)-नेपालमा ताप्लेजुङको धुम्सावाट विशिष्ट व्यक्तिहरू सहित २४ जना लिई उडेको एउटा हेलिकप्टर बेपत्ता भएको दोस्रो दिन आइतवार खोजी कार्य जारी राखिए पनि खराब मौसमका कारण सो विमानबारे केहि पत्ता लाग्न नसकेको अधिकारीहरूले बताएका नेपाली सञ्चार माध्यमहरुमा जनाइएको छ।
त्यसैगरी सञ्चार माध्यमहरुमा जनाइए अनुसार,पूर्वी नेपालको ताप्लेजुङस्थित धुम्सावाट शनिवार विशिष्ट व्यक्तिहरू सहित उडेको एउटा हेलिकप्टरको खोजीकार्यमा आइतवार पनि कुनै उपलब्धी हासिल हुन नसकेको अधिकारीहरुले बताएका छन्। प्रतिकुल मौसमका कारण हवाई माध्यमवाट खोजी कार्यमा अवरोध पुगेकाले धुम्सावाट तीन घण्टाको दुरीमा सात सदस्यीय खोजी टोलीलाई आईतवार अपरान्ह हेलिकप्टरवाट ओह्रालिएको छ। साथै समय वित्दै जाँदा हेलिकप्ट्रमा सवार वन तथा भूसंरक्षण राज्यमन्त्री, वरिष्ठ अधिकारीहरू तथा स्वदेशी एवं विदेशी विशेषज्ञहरुको अवस्थाप्रति आशंका र चिन्ता वढ्दै गइरहेको छ। त्यस क्रममा आइतवार करिब चार बजे ग्याब्ला भन्ने ठाउँमा हेलिकप्टरवाट ओह्रालिएका केहि उद्दारकर्मीहरूसित साँझसम्म सदरमुकामको सम्पर्क हुन नसकेको नेपाली सेनाको फूङलिङ कार्यालयले जनाएको प्राप्त समाचारहरुमा जनाइएको छ।
त्यस क्रममा प्राप्त समाचार अनुसार,उद्धारटोलीसित स्याटलाइट फोन नभएको हुनाले सम्पर्क हुन नसकेको उद्धारकार्यका संयोजकहरू मध्येका एक हिमालयन उद्धार संघका अध्यक्ष विक्रम न्यौपानेले बताए। उनले भने, “हतार हतारमा उद्धार टोलीहरू पठाइएको हुनाले त्यसो भएको हुन सक्छ।”यसका साथै न्यौपानेले मंगलवार सेना सहितको थप उद्धारकर्मीहरू काठमाडौंबाट विराटनगर पठाई त्यहाँबाट हेलिकप्टरमा संभावित घटनास्थलतर्फ पठाइने कार्यक्रम रहेको बताए। ताप्लेजुङका प्रमुख जिल्ला अधिकारी हेमराज दवाडीले खोजीकार्यमा स्थानीयवासीहरूको पनि सहयोग लिइएको बताए। ’त्यसैगरी थाहा भए अनुसार,नागरिक प्राधिकरणले हराइरहेको हेलिकप्टरकाबारे जानकारि दिने व्यक्ति वा संस्थालाई रू २,०१,०००/- पुरस्कार दिइने घोषणा गरेको छ। त्यस क्रममा बेपत्ता हेलिकप्टरमा वन तथा भूसंरक्षण राज्यमन्त्री गोपाल राई, उनकी श्रीमती, अन्य बरिष्ठ सरकारी कर्मचारीमा वन मन्त्रालयका सचिव दामोदर पराजुली, वन विभागका महानिर्देशक शरद राई, राष्ट्रिय निकुञ्ज तथा वन्यजन्तु विभागका महानिर्देशक डा. नारायण पौडेल लगायतका सरकारी अधिकारीहरू सवार थिए। त्यस्तै प्रसिद्ध भूगोलविद तथा अनुसन्धानकर्ता डा. हर्क गुरूंग, विश्व वन्यजन्तु कोष नेपालका प्रमुख अधिकारी डा.चन्द्रप्रसाद गुरूंग, तिर्थमान मास्के जस्ता स्वेदशी विशेषज्ञहरूका साथै विदेशी वातावरण संरक्षण परियोजनाहरूका अधिकारीहरू तथा फिनल्याण्ड राजदूतावासका बरिष्ठ अधिकारी समेत उक्त हेलिकप्टरमा रहेका प्राप्त समाचारहरुमा उल्लेख छ।